Nær drottni-Guð-almáttugum-dagurinn

Heil og sæl öll sem eitt. Dagurinn í dag hófst að venju á teboði nema nú var það haldið á herbergi voru. Eftir að teið og skonsurnar voru runnar niður lá leið okkar niður og svo upp. Nánar tiltekið var haldið niður í jarðlestarnar og svo upp í Eiffel-turninn. Þar var dvalið uns tók að rökkva og heilsað upp á drottinn vorn og horft í leiðinni yfir hina fögru borg París. Svo unnum við okkur niður á við í rólegheitum með þar til gerðum niðursveiflum sem við fengum lánaðar hjá FL-Group. Gert var stanz á veitingahæðinni og bragðaðar himneskar vöfflur og kakó. Þessi mikla og upplífgandi reynsla varð tilefni sigurgöngu. Því var tilvalið að leggja leið sína að Sigurboganum og fagna þessum merka viðburði með Napóleon og öðrum sigursælum leiðtogum þessa lands. En vegna skorts á veitingahúsum og ævintýraþrá ferðamanna var, því miður, leiðin lögð á Planet Hollywood sem var viðkomustaður fæðuöflunar þetta kvöldið. Þar sem eldri borgarar ferðarinnar voru orðnir þreyttir eftir snæðinginn var ákveðið að skella sé heim í háttinn og bíða þess að morguninn risi bjartur og fagur eins og í Walt Disney ævintýri.

Þess má geta að hér poppaði upp á skjáinn hjá mér jólarós sem er fallegasta rós sem til er í hinum stóra heimi en er þó ekki að finna hér í París. Þó er ástina því miður hér ekki enn að finna þó svo víða hafi verið leitað. Erum samt vongóðir þar sem Rauða myllan er eftir en hún er sögð geyma hina fornfrægu frönsku ást.

Með ástar- og saknaðarkveðjum,

Jón Þorsteinn (NNF)